Эўрапейскі парлямэнт заклікаў Эўразьвяз увесьці санкцыі ў дачыненьні да 32 расейскіх чыноўнікаў, якіх лічаць датычнымі да крымінальнага перасьледу юрыста фонду Hermitage Capital Сяргея Магніцкага. Гэта вынікае з рэзалюцыі аб барацьбе з карупцыяй, прынятай Эўрапарлямэнтам 13 верасьня.
За дакумэнт прагаласавалі 578 дэпутатаў, супраць — 19, яшчэ 68 устрымаліся. Парлямэнтары прапануюць забараніць асобам, занесеным у «сьпіс Магніцкага», уезд у краіны Эўразьвязу і замарозіць іхныя эўрапейскія актывы.
«Акт Магніцкага» названы ў памяць аб юрысьце фонду Hermitage Capital Сяргеі Магніцкім, які раскрыў схему буйных крадзяжоў з расейскага бюджэту (сканаў у маскоўскім СІЗА ў 2009 годзе). Дакумэнт быў прыняты Кангрэсам ЗША ў канцы 2012 году і пазьней пашыраны. Ён прадугледжвае візавыя і эканамічныя санкцыі ў дачыненьні расейцаў, якія маюць дачыненьне, на думку Вашынгтону, да парушэньняў правоў чалавека.
Эўрапейскі парлямэнт ухваліў сьпіс з 32 расейцаў яшчэ ў 2014 годзе, і з тых часоў неаднаразова заклікаў ЭЗ увесьці санкцыі супраць іх.
